ملاحظات عن كأس العالم وإسرائيل وحاجات كتير  

June 18, 2006

البارح وأنا مأنتخ - على رأي المعاتيه الروشة - بتابع مباريات كأس العالم ... لاحظت كام ملاحظة مهمة جداً:
ملاحظة أولى : في مباراة غانا والتشيك البارح وفي صفعة لكل الجماهير العربية اللي كانت متعاطفة مع الفريق الغاني بحكم الانتماء الأفريقي أو إنه غلبان زينا اللي أدى أداء رائع وفاز 2- 0 يخرج اللاعب جون بانستيل من فريق غانا علم إسرائيل من شرابه !! ويحتفل بفوز منتخب بلاده ؟؟!!!!! طبعا إذا عرف السبب بطل العجب ، والسبب إن بانستيل بيلعب في فريق إسرائيلي إسمه هابوعيل تل ابيب وفي زيه اتنين من غانا محترفين في المحروقة إسرائيل كمان !! بس مش اللاعب ده عبيط ؟؟ يخرج علم بلد غير بلده ليه ويهلل بيه ؟؟ مش دي تبقى خيانة ؟؟ أكيد في إنا !!؟؟؟؟
ملاحظة تانية : قبل الكلام ده في مباراة إيران والمكسيك فوجئت بعلم إسرائيل بين أيدي المشجعين المكسيكيين ؟؟ ليه ؟؟ وطنية بالشقلوب ولا بيحرقوا دم الإيرانيين ؟؟ ولا قلة مندسة مش من المكسيك ومجرد مشجع يهودي غاوي قلة أدب ؟؟ أكيد في إنتين ؟؟؟؟؟؟؟؟!!؟؟
ملاحظة تالتة : كالعادة بيتم ترجمة الملصقات الدعائية للمونديال واللي بتحمل الشعا زي البروشورز والفلايرز لكل لغات الدنيا ، المرة دي لفت نظري حاجة ،، العرب مشاركين بدولتين ، وتاريخهم في المونديال من سنة 1978 وهما بيشاركوا فيه ،، ومافيش كلمة توحد الله بالعربي ؟؟؟؟؟ في المقابل في شعارات بالعبري ؟؟ وإسرائيل عمرها ماشاركت في كأس العالم وإن شاءالله ماتشاركش ؟؟ الفكرة شوف كام واحد بيتكلم عربي وكام واحد بيتكلم عبري ؟؟؟؟؟؟ أكيد في مليون إنا وإنا
ملاحظة رابعة ومهمة جدا : ليه المتابعة العبيطة دي من العالم العربي لكأس العالم والواصلة لحد الهوس ؟؟ بنتابع المونديال كإننا بنتابع العبور أو فتح عكـــا ؟؟ حد أخد باله بالمصايب اللي بتحصلنا في فلسطين والعراق ؟؟ ولا حتى في مصر ؟؟؟ كام واحد تابع فاجعة الطفلة هدى في غزة اللي فقدت أهلها وكام واحد تابع في نفس الوقت إفتتاح كأس العالم ؟؟ مش عايز أعرف الإجابة
ملاحظة خامسة مش مهمة أبدا : عارف إن المتابعة مش مرفوضة ، أنا عن نفسي بتابع وبشغف كبير المباريات ، يكفي إننا بنتفرج على كورة فعلا وفن ومهارة مش العك بتاع لاعبينا ؟؟؟ كفاية ياعالم اللي تابع مباراة الأرجنتين وصربيا 6 - 0 وشاف الفن ، جاله نفس إزاي يتابع في نفس اليوم مباراة الأهلي والزمالك ، واللي انتهت بفوز الأهلي كالعادة ، وخسارة الزمالك كالعادتين ؟؟؟؟
بس الفكرة إن لازم يكون عندنا أولويات عشان ماننساش نفسنا وقضيتنا : الحرية ، سواء لأهلنا في فلسطين والعراق ، أو لينا إحنا عبيد النظام في مصر ... للأسف

Facebook Comments

Design by Blogger Buster | Distributed by Blogging Tips