س وَ ج تدويــن  

August 22, 2006

وصلني الاستجواب الظريف ده من العزيزة ميوي ومدونتها عجبي
هل أنت راض عن مدونتك شكلاً وموضوعاً؟
شكلا بحاول أجدد كل فترة وفترة لغاية ماوصل لشكل أستقر عليه شوية ، بس الصعوبة التقنية بتخليني على أد حالاتي ، عاجبني اللون الأسود والسايد بار بيقضي الحال ، بالنسبة للموضوع ، عيبك عليكم دي حاجة هيلة مووووووووووووووت ، لأ بجد الفكرة إن دي أفكاري وده أنا ، مش حاجيب من بره ، ولو حبيت أجاوب عن الجزء ده حايكون كانك بتسألأني عاجبك نفسك ولا لأ ؟؟ أكيد عاجباني
هل تعلم أسرتك الصغيرة بأمر مدونتك؟
ملهاش في الكلام ده ، أخويا عارف وبقريه بالعافية والإكراه ، عامة مش هاممني رأيهم كتير صراحة ، بس باوريهم أي حاجة ممكن يساعدوا فيها زي حملة لبنان مثلا ، لعل وعسى !!؟؟
هل تجد حرجاً فى أن تُخبر صديقاً عن مدونتك؟ هل تعتبرها أمرا خاصا بك؟
صراحة بلغت الناس كلها لما عرفت إني ممكن أجند منها عملاء لصالح أي حاجة تنفع المجتمع ، بس غير كده أنا بكتب لنفسي وبس ، أيوه بقيت حريص أسمع رأي الناس المهتمة أو القريبة لكن مش بكتب حاجة إلا عشان انشكح وانا شايفها قدامي أنا بس على الشاشة

هل تسببت المدونات بتغيير إيجابى لأفكارك؟ اعطنى مثال فى حالة الاجابة بنعم

لأ ، مدونتي بتعبر عن أفكاري وأكيد بتطور مع الوقت ، وماعتقدش اني في حاجة لتغير ايجابي لاني جاااااااااامد جدااااا ، وبالنسبة للباقي ، بيعجبني حاجات كتير بس مافيش درجة التغيير في فكري ، قلتلكم انا جااااااااامد جداااااااا ، عامة انا ماابحرتش في عالم البوجرز كتير ، مين عارف ؟؟

هل تكتفى بفتح صفحات من يعقبون بردود فى مدونتك أم تسعى لاكتشاف المزيد؟
من مبدأ أناني والمعاملة بالمثل باهتم أكتر أعرف مدونة اللي علق على مواضيعي ، لكن بحب أستكشف برضه ، خاصة المدونات المفضلة للأشخاص اللي بمر على مدوناتهم باستمرار
ماذا يعنى لك عداد الزوار.. هل تهتم بوضعه فى مدونتك؟
بصراحة مش بيهمني بالمرة لأن الهدف من المدونة هو ارضاء غروري وتبجيل شخصي الهايل ، لكن حاطه نوع من الرفاهية لا أكثر ولا أقل ، وبيني وبينكم كمان عياقة على خلق الله
هل حاولت تخيل شكل اصدقائك المدونين؟ اعترف
هو بيبان مووووووووووت من الكلام والأفكار ، عارف ان في صور نمطية خاطئة في حياتنا برضه بس أنا ليا صوري الخاصة لبعض الشخصيات ، عامة من المدونين أصدقاء شخصيين فامش محتاج أتخيل.
هل ترى فائدة حقيقية للتدوين؟
أكييييد ، إني أدي الناس فرصة تتشرف بمعرفتي ،،، لا صراحة هي زي مابيقولوا "فش خلق" وكمان فرصة انك تعرف غيرك بيفكر إزاي وكمان بيشوفك ويقيمك إزاي ، غير كده أنا نفسي ومنا عيني إن دور التدوين في عالمنا العربي يصل لمرحلة الصحافة الشعبية البديلة ، ومافيش مانع إن نرفع شعــار "بلوج لكل مواطن" على سبيل التغيير
هل تشعر أن مجتمع المدونين مجتمع منفصل عن العالم المحيط بك أم متفاعل مع الاحداث؟
ماقدرش أعمم الموضوع ، بعض المدونين بحس إنهم زيي مثلا ، عبارة عن مرضى نفسيين وعندهم إما جنون العظمة أو الاضطهاد ، وبعضهم خيالي ورومانسي لدرجة الانفصال عن أرض الواقع والرحيل لدنيا أخرى بمبي مسخسخ ؟؟!! لكن فعلا في ناس بتعبر عن جزء كبير من مجتمعنا وبيساهموا في تحسينه ، لكن بشكل عام لو اتفقنا على مفهوم مجتمع المدونين ، بحس إن التدوين بقه لمجموعة عبارة عن إدمان لثقافة معطوبة على مستوى نخبة معينة مالهاش علاقة بالواقع ، ليه ماعرفش سعادتك ، ممكن بيهربوا وممكن قرفانين مننا ؟؟
هل يزعجك وجود نقد بمدونتك ؟ أم تشعر انه ظاهرة صحية؟
مش بيضايقني بالمرة لأني عارف إني أفضل من كده وان اللي بينقدني شخص مش فاهم أو شخص حاقد ، لكن بعيدا عن الأنوية العليا دي لأ بحب النقد جدا ، كلام فارغ طبعا أكيد أحيانا بيحرقني ، لكني بستمتع بفكرة إني أخدت من وقت حد إنه يفكر أكتر في النقد ، النقد بياخد مجهود وتركيز أكتر من المدح ، عشان كده بحبه موووووووووت خاصة من الناس اللي عارف انهم بيفيدوني بموضوعية جدا
هل تخاف من بعض المدونات السياسية وتتحاشاها؟
دي حبي الأزلي ، إديني في السياسة وأنا أحبك يانننس !!؟؟ بس مابحبش فيها جو التعصب الأعمى أو الفلسفة الزايدة اللي بتتجاوز أحيانا بعض الحدود
هل صدمك اعتقال بعض المدونين؟
لو كان يصدمني اعتقال المدونين فاحكون عبيط ، أولا هما اعتقلوا عشان المظاهرات والحكومة سايبة الجرايد الورق تهب فيها بحدود إنما إحنا أصحاب المدونات جمهورنا هو إحنا ، سيبهم يهوهوو !!؟؟ بس الفكرة إني تضايقت طبعا ، لكن لو كنت صدمت أبقى إنسان عبيط ،، هو إحنا كمدونين ملايكة ؟؟ النظام بيعتقل أطفال ونساء وبينتهك أعراضهم ؟؟ اشمعنا إحنا يعني ؟؟ خربانة خربانة ،، أنا بيؤلمني المفهوم كله بغض النظر عن ضحيته
هل فكرت فى مصير مدونتك حال وفاتك؟
فال الله ولا فالك !!!؟؟؟؟؟ عامة حاوصي الورثة إنهم يكملا المسيرة هما وتلامذتي من بعدي
آخر سؤال : تحب تسمع أغنية إيه- بلاش صيغة آمال فهمي دى - ما الأغنية التي تحب وضع اللينك الخاص بها في مدونتك؟
بيكون على حسب الموود والمناسبة وعامة بحب اسمع في أي مكان حتى في المدونة أي حاجة لـ
coldplay
اكتب أسماء خمسة مدونين ليقوموا بهذا الاستقصاء بعدك

Facebook Comments

Design by Blogger Buster | Distributed by Blogging Tips