تحرشات بالجملة ،، البلد هيجانة ياجماعة  

November 14, 2006

من خلال مدونة الوعي المصري انتشر تسجيل لانتهاك مواطن مخبر أو حرامي مش فارق المهم امتهان وانتهاك إنسان في أحد أقسام الشرطة على أيدي رجال الشرطة الأفاضل ،، بالتأكيد مش حانشر الفيديو عندي بس عندي كلمتين لازم أقولهم

أولا : ماحدث ويحدث وسيحدث هو عبارة عن حيوانية لا أكثر ولا أقل من قبل بعض الحيوانات المتخفية في ثياب البشر ، وهم عبارة عن مرضى نفسيين وجدوا ضالتهم في البدلة الميري من أجل إشباع عقدهم وأمراضهم في خلق الله ، والوضع أصبح من الفجور لدرجة تصوير الأمر وتسجيله وكأنه أمر محمود وتذكار يمكن التفاخر به ؟؟ وسكوت النظام أصبح لا يحتمل السكوت عليه !! الأمر أصبح خارج عن المألوف وغرابته تجعلني حتى بعد المشاهدة المصدومة غير مصدق له ، ليس في ديننا ولا مجتمعنا ولا أخلاقنا وعاداتنا وتقاليدنا مايقود لهذه النتيجة البشعة !! حتى عالم الحيوان ليس به هذا الفجور والفسوق والسادية العجيبة ؟؟

ثانيا : يبدو أن الأمر لم يعد مقتصرا على رجال الأمن ، بل تعداه إلى الشعب المسالم والوديع !! أيام العيد وحادثة وسط البلد تشهد على ذلك ، يبدو أن هناك وباء من الحيوانية المفرطة قد غزى البلاد ، ويبدو أن أعراضه تبدء بحالة هياج عام لاتفرق بين ذكر وأنثى ، هو في إيه بالضبط ؟؟ المشكلة فين ؟؟ طيب ورجال الشرطة عرفنا إنهم زبانية متخفيين في صورة بشر ، طيب المواطن ده إيه اللي جراله ؟؟ بلاش لو سمحتوا كلام الكبت والظروف ، وكمان إن المشكلة في الأمن اللي وقف يتفرج ؟؟ هو أمن بيغتصب الرجالة عايزينه يمنع التحرش الحميد بالأنثى ؟؟

ثالثا : إيه المغزى من نشر الفيديو ده عبر النت ؟؟ مين اللي جابه ؟؟ كان من الأولى يوديه لجهة قضائية ويتصرف ؟؟ ولا الموضوع بس نشر السبق وخلاص ؟؟ الناس خلاص ياجماعة مش محتاجة تعبئة ضد النظام ، كله عارف مساوؤه ومشاكله ، والكل رافض الحال ... بس ساكت !! فاكرين الفيديو حركهم ؟؟ ولا غيره من مظاهر انتهاك وقمع وطغيان ؟؟ أبداً ، في الأغلب حرق دمهم ولفوا نحية الحيطة وقالوا زي ماوائل قايل آخر البوست : حسبي الله ونعم الوكيل !! والأعم زاد خوفه وبقى ينفخ في الزبادي ويقول خلينا جنب الحيط !! ماشفتش حد من أصحابي إلا وحكالي أنيل من اللي شفته ده أو تجربة لشخص يعرفه أو حاجة شافها بعينه ؟؟ طيب .. هاه وبعدين ؟؟ الحل فين ؟؟


الفكرة ببساطة بعد الرغي الزبالة ده إن البلد في حاجة في مجتمعنا وتركيبته وتركيبة قيمه غلط !! ليه كل حد في البلد إما عبد وإما سيد ؟؟ وليه فوق كل سيد سيد وتحت كل عبد أكيد في عبد ؟؟ ليه بناخد على قفانا ونقول كمان ؟؟ ليه صبرنا زي أيوب ؟؟ وأخلاقنا مش زيه ؟؟ صبر أيوب كان على بلاء ربه ، مش على بلوة عبد ؟؟ حسن نصرالله قال في خطاب مرة : وجهت لنا إساءات لا يصبر عليها إلا الأنبياء ، وأنا ومن معي من صحبي مش أنبياء !! ليه ماعندناش كرامة ؟؟

كمان مش عارف : بدل الواحد يقعد يعري النظام العريان خلقه مايجرب يقترح على سبيل التغيير حل ولو لمرة واحدة ؟؟ مليون حملة وتانية من أجل التغيير ومافيش حل قدمته أي حاجة منها ؟؟ طب لو ده حالنا وإحنا مثقفين وعندنا القدرة على التعبير مستنيين الحل يجي من اللي معندوش فرصتنا إزاي ؟؟


أنا محروق دمي وعارف إني هرطقت بكلام مش مفهوم ، بس هو في إيه في عيشتنا دي مفهوم ؟؟

Facebook Comments

Design by Blogger Buster | Distributed by Blogging Tips