الحمد لله على نعمه،، كفاية كآبة  

November 30, 2006


كل واحد فيه مشاكل الدنيا والآخرة ، والواحد مننا لو كانت مشكلته إن ( مع الاعتذار عن اللغة) صباع رجله الصغير - مدوحس - فده في نظره أهم من مشكلة تيمور الشرقية !! كل واحد مننا شايف نفسه شهيد ظلم الظروف والمجتمع ، ولو الدنيا مش ماشية زي ماهو عايز - وده الأغلب - يدخل في الحالة الأكثر شهرة بين الشباب العربي ، إكتئاب حتى النخاع
أنا مش بعيد عن الصورة ، وبقالي كام يوم في الحالة دي ، والدنيا أسود من الباذنجان الكيني - لو في حاجة اسمها كده - ومش عارف أتصرف وباكل في نفسي وباتحرق من جوه ، والغريب إني بقيت ادور زي المدمن على كل مايكئب حضرتي أكتر وأكتر عشان أعذب نفسي زيادة !! وبقت أتفه المشاهد وابسط الظروف السوداء تجعلني انتحاري الهوى سوداوي المزاج - حلو الكوبليه الأخير ده - أعتقد إن كتير صادف الحالة دي أو بيعشها فعلا حاليا وبنجاح ساحق في دور العرض
من حوالي اسبوعين قابلت زميل كنت اعرفه بشكل سطحي في احتفال بنشاط جامعي كنا بنشارك فيه من فترة ، وباعتبار اننا الاتنين عواجيز فرح ومالناش لزمة في الليلة قعدنا على جنب واتكلمنا وكان حظي جميل لأنه شخص جميل جدا ، قالي على الحالة دي اللي في الشباب إن حلها إنك تبتسم للحياة وتسخر منها ، وده حايديك الطاقة والعلو على كل مشاكلك ، كلام محترم بس مش كل الناس تعرف كده
من كام يوم قبلت صديق عزيز برضه اسمه ناصر ، قالي مشكلتنا اننا مستعجلين المشاكل كشباب ، والناس مابتبصش على الحلو اللي في اديها وبتدور على الوحش ، مع إن الحلو لو ركزنا كتير ويستاهل اننا نحمد ربنا عليه ونستحمل علشانه الوحش ،، كفاية نعمة الصحة !! ان اهلنا معانا وبيحبونا ، ان في ناس بتحبنا وبتحترمنا ، إن في أصدقاء بيسندونا وبيساندونا وقت الشدة ، إننا عندنا كومبيوتر قاعدين عليه وبنقرا الكلام ده !! مش كل دي حاجات حلوة مش عند غيرنا ؟؟
ياريت فعلا نحمد ربنا على الكلام ده وغيره ، ياريت نعرف إن الحاجات دي مش مسلمات عادية عند كل الناس ، ياريت ناخد لحظة من كآبتنا ونتخيل حياتنا من غير الحاجات العادية دي حايكون شكلها إيه ؟؟
الحمد لله الذي عافاني مما أصاب به غيري وفضلني على كثير من العالمين
اعتذر عن اللغة العامية لكنها الأقرب للغة خواطري

Facebook Comments

Design by Blogger Buster | Distributed by Blogging Tips