الشعب مش فاهم حاجة .. واحنا السبب ؟؟؟  

April 19, 2007

لاحظت حاجة جميلة جدااااااً - مش عارف جميلة في ايه بس جميلة وخلاص - أو ممكن نقول عليها تحفة - باعتبار مش ضروري التحفة تكون حلوة أو وحشة - أيام الاستفتاء على مهلبية الشعب الجديدة المماه باسم دلع هو الدستور المصري ، وهيا إن الشعب بيقول أيوه بيقول لأ برضه مش فاهم حاجة ؟؟!!؟؟

المشهد الأول
ده نص حوار دار في ريبورتاج للجزيرة من أمام إحدى لجان البظرميييط الخاصة بالاستفتاء وفيها نموذج لحد قال أيو:ـ
المذيعة:ـ حضرتك جيتي استفتيتي على تعديلات الدستور الأخيرة ؟؟
المواطنة - وعشان تكون في الصورة تخيل أم عبده بياعة الفجل في سوق الخضار الي تحت بيتكم أو لو كنت هاي كلاس تخيل ماتتخيلش مش مشكلتي أنا !! - :ـ أيوه ياختشي - لا أخطاء إملائية - اشتفتيت
المذيعة:ـ وقلتي إيه ياحجة ؟؟ - طبعا انسى حضرتك دي بعد ياختشي واشتفتيت !!- أيوه ولا لأ ؟؟
الحجة المواطنة:ـ قلت أيوه طبعاً - أخدتوا بالكم انتوا من طبعاً دي - !!؟؟
المذيعة:ـ طب انتي عارفة ايه التعديلات الجديدة ؟؟ - سؤال غبي/ذكي مش عارف أحدد - ؟؟
الحجة - وببلاهة عفوية- :ـ لأ ماعرفهاش ياختشي !!؟؟
المذيعة -وبقرف بالغ(منالواضح انموضوع ياختشي ده بقه أووففر ) :ـ طب قلتي ايه على أساس إيه -سؤال منطقي وبيكفله الدستور طبعا - ؟؟
الحجة الناطق الرسمي باسم شعب الحزب الوطني :ـ ياختشي ده الريس اللي جابهالنا - كإنه جابهولنا من الحجاز بعد العمرة ؟!- هو الريس حايجيبلنا حاجة وحشة كافارالله الشر - مش عارف بتتكتب إزاي عان ماعدتش عليا في المدارس دي !!- ده الريش ياختشي وأكيد عارف مصلحتنا أكتر مننا ومن أي حد !!؟؟؟؟؟؟؟؟؟؟؟؟؟

المشهد التاني
ده حوار لحد قال آآآآه مش أيوه - يعني بالعربي قال لأ- بس خلينا نبص قال لأ إزاي ؟؟؟
المذيعة - طلع عينها البنية دي معانا والله - :ـ حضرتك إستفتيت ياأستاذ ؟؟
الأستاذ - وهو ولا أستاذ ولا حاجة ، تخيل معايا الميكانيكي اللي بتروح تلحم عنده فردة الكاوتش ولا الشكمان - :ـ ايوه ان شاءالله ورحت قلت لأ طبعاً
المذيعة :ـ طب ياسطى -البنت دي بجد مذعة هايلة بتاخدها من قاصرها - قلت لأ ليه ؟؟
الأسطى:ـ ياست هانم دي تعديلات أي كلااااام وحاتودي البلد في داهية والناس رايحة زي لا مؤاخذة البهايم تنتخب - هي انتخابات ولا استفتاء ؟؟ ماعلينا ماندقش - وتقول ايوه ؟؟ الناس ياخسارة بقه معندهاش عدم وعي - معندهاش عدم وعي ؟؟ تركب إزاي دي ؟؟ لا فيلسوف بروح أم.... بلاش - ؟؟؟
المذيعة - الله يكون في عونها - :ـ طب انت ايه اللي مش عاجبك في التعديلات الأخيرة ؟؟ - سؤال منطقي وبديهي ويستحق عشر درجات - ؟؟
الأسطى الفيلسوف المعارض :ـ كل الدستور الجديد ده مش حلو القديم كان أحلى - بيشتري قميص من الوكالة -!!؟؟
المذيعة :ـ يعني ايه بالتحديد اللي انت معترض عليه ؟؟
الأسطى البيه الفيلسوف :ـ مش عارف بصراحة بس أكييييييييد الموضوع فيه إنَا ومؤامرة !! أصل الناس اللي مسكاها مش حاترتاح إلا لما تخربها !! وكمان إسرائيل مش حاتسيبنا في حالنا -!!!! إسرائيل !!!!- ؟؟؟

المشهد الثالث
بسيط جدا : يوم الاستفتاء ركبت تاكسي ، ودارالحوار البسيط التالي:ـ
أنا :ـ هي البلد زحمة ليه كده بدري - طبعاً غلطت عمري وحاتعرفوا ليه - ؟؟
الأسطى:ـ عشان النهاردة الانتخابات الرئاسية
أنا :ـ قصدك الاستفتاء بتاع الدستور !!؟
الأسطى:ـ ايوه هي الانتخابات اللي بقولك عليها دي
أنا:ـ .......؟؟؟
الأسطى:ـ انت عارف ياأستاذ هي بلدنا دي مش عارف آخرتها ايه ؟ عالم فاضية والله يروحوا ينتخبوا ويقولوا ايوه ويقولوا لأه ؟؟ هو احنا ناقصين ؟؟ والبلد والمعارضة - يبقى قصده البلد على الحكومة ؟؟ كلام جمييييييل - بيتخانقوا ومش حملهم علينا ؟؟
أنا:ـ ............ـ
الأسطى:ـ أصلك مش عارف ؟؟ هو انا مثلا مارحتش انتخبت ليه ؟؟ اقولك ليه انا
أنا:ـ ...........ـ
الأسطى النبيه :ـ عشان قسط العربية دي انا لو رحت انتخبت مين حايجيب ايراد النهاردة ؟؟ طبعا ماحدش !! وكمان انا مش عارف مين اللي نازل الانتخابات بالظبط ؟
أنا :ـ ؟؟؟؟؟؟؟؟؟؟؟
الأسطى :ـ بس متهيألي الراجل ده اللي ياخدها كل مرة حايكسب برضه المرة دي .. استنى كده افتكرلك اسمه ؟؟
أنا :ـ .....؟؟؟؟؟؟؟؟
الأسطى :ـ أصل كل اللي نازلين قدامه ناس كده اي كلام مالهومش لازمة ... استنىكده اسمه كان في بالي خير اللهم اجعه خير ؟؟
أنا :ـ ..........ـ
الأسطى :ـ بس انت لو تابعت النشرة البارح كنت حاتسمع النتايج وانهم قالوا انه كسبان كسبان
أنا:ـ على جنب ياسطى
الأسطى :ـ بس اعرف اسمه بس ؟؟ .... ليه ياأستاذ مش قلت محيي الدين ؟؟ لسه مجاش ؟؟
أنا:ـ لا حاكمل الباقي مش

المشهد الرابع
أعضاء جبهة المعارضة الإخوان مع المستقلين معتصمين يوم التصويت على التعديلات وقاطعوا الجلسة احتجاجا .. والنتيجة ؟؟ موافقة بالاجماع في الداخل على التعديلات !! طب ياهبل منك له سجلوا اعتراضكم رسميا ؟؟ مادامتكوسة بكوسة ؟ فاكرين اعتصامكم فاد حد ؟؟؟؟ طب كنتوا فين يوم الاستفتاء؟؟؟
الختام :ـ
بجد مش عارف اقول ايه ؟؟ انا بعتذر لو تجنيت على الناس البسطاء دول ، انا مش قصدي احملهم أي جزء من حال البلد التعيس ، انا شايف ان السادة المثقفين - أمثالي أو أمثال سعادتك ياللي بتعرف تخش وتقرا البلوج - وأمثال السادة النخبة المثقفة المسيسة اللي مسميه نفسها معارضة اننا نوعي الناس البسيطة دي بحقوقها وبحقيقة الوضع ؟؟ مش هو ده الصح ؟؟ مش ده حقهم وحق بلدهم علينا ؟؟؟؟ مش ده هو واجبنا قدام ربنا عشان نشكر على نعمته علينا بالفكر والعقل ؟؟؟

هاه ؟؟ حاتعملوا ايه دلوقتي ؟؟ حاتتصرفوا ؟؟ ولا حاتعملوا زيي ؟؟ واقول : على جنب ياسطى ؟؟

Links to this post

صورة بألف عام !!؟؟  



الصورة بألف كلمة .... هكذا دائما يقولون !! لكن هاتين الصورتين - وهما مثال لملايين نفوقهم معنى وسوداوية - بها أكثر من بضع كلمات ، ولو كان تعدادها بالآلاف !! لا أجد التعليق الكافي على أي منهما - أو حتى غيرهما - غير أن هذا حالنانحن العرب - كل العرب هذه الأيام

الصورة الأولى حصلت عى جائزة دولية كأفضل صورة لعام 2003 ، أي عام إحتلال العراق وسقوطه

والصورة الثانية الأفضل - لا أدري فيما هي تستحق أن تكون الفضل ... لعلها لأنها لأكثر تعبيراً - لعام 2006 .. بعد مرور ثلاث سنوات ... مازالت الصورة شبيهة بالصورة ، وإن كثر من اصطفوا في كادرها !؟؟؟

ترى كيف سيكون شكل الصورة الفائزة بعد ثلاث سنوات أخرى ؟؟ كيف سيكون شكلها لهذ العام ؟؟ لآ أريد أن أعرف


Links to this post

Design by Blogger Buster | Distributed by Blogging Tips