معاك وحدك  

July 13, 2011

شعور مريع لما تحس إنك لوحدك.. 
حتى والناس حوليك..
بتحبك.. بتساعدك..
لما تفقد الإحساس
شعور مخيف لما تحاول انك تحب..
 وماتعرفش حتى انك تكره..
تبقى جثة..
يبقى حكيك كله وسواس
شعور مش لطيف..
وأكيد مش ظريف..
إنك تصبح معاك لوحدك ..
وانت لا ميت ولا حي
إنك في وسط بيتك تبقى كما التايه..
لا إنت عارف ان كنت رايح..
أو كنت جي !!
إنك تساهر ليل طويل..
تحاربه.. وانت مش قده..
يغلبك.. يقتلك..
يخليك لا صاحي ولا نايم
إنك تحس بالألم ..
بشيء مش مريح في جسمك..
بيكلك أكل من جوه..
ولا ترتاح قاعد ولا قايم !!
إنك تحس رغم قرب ميلادك..
إن عمرك مليون سنة ..
جواك مليون حكاية..
ومليون جرح ونهاية..
مليون نهاية لمليون إحساس جميل..
إتولد عشان يموت ..
مليون نهاية لبسمة حاولت يدوب تعدي على شفايفك..
بس وقتها كان قصير..
مش جي يبقى.. يدوب يفوت..
لما يكون بالك مشغول..
مشغول زي المقابر..
بمليون حلم إما راح وانكسر..
زيك..
إما صار كابوس..!!
لما تكون مطفي ..
وشك مطفي ..
كلامك مطفي..
حلمك مطفي..
لما تكون اليوم ضلمة..
بعد ما كنت لغيرك فانوس!!
لما يكون همك..
همك لوحدك..
لما يكون دمعك..
بس على خدك.. 
لما تدوي صرختك بالآه..
ما يسمعها غير ودنك..
لما تكون كلك على بعضك..
رغم كل الناس ..
معاك وحدك..

Facebook Comments

Design by Blogger Buster | Distributed by Blogging Tips